لومړۍ برخه: کلیات

سریزه

ستراتیژیک مدیریت هغه بهیر دی چې د راتلونکي لید څخه پیلیږي، د لومړیتوبونو له ټاکلو او هدفګذاري څخه مخکې برنامه ریزي کوي او د برنامو له پلي کولو وروسته ترلاسه کیدونکې پایلې ارزوي ، د فیډبک له لارې پایلې ترلاسه اود لاسته راغلو پایلو له مخې د لومړیتوبونو او موخو متناسب پرې بیا کتنه کوي، له دې امله ستراتیژیکه برنامه ریزي په سازمانونو او نننیو بنسټونو کې ډیر اهمیت لري، چون ستراتیژیکه پلانګذاري د سازمان موخې د هغه مأموریت ته په کتو ټاکې او د چاپیریالي مطالعاتو له لارې، فرصتونه، ننګونې ، د کمزورتیا او ځواکمنتیا ټکي پیژني ترڅو له دې لارې واقع بینانه موخې تعیین او ترسره کړي.

خاتم النبیین^(ص) پوهنتون پورته اړتیا ته په کتو خپل دوهم ستراتیژیک پلان په ۱۴۰۵ کال کې د افغانستان د لوړو زده کړو وزارت له معیارونو او لارښوونو سره سم تدوین کړی دی. دا پلان شپږ برخې لري؛ « کلیات»، « آرماني برخې»، « د چاپیریال او ستراتیژیو تحلیل»، « موخې، ستراتیژۍ، کلني اجرایي شاخصونه»، « د څارنې او ارزونې ترسراوی»، « ضمیمې(کلني عملیاتي پلانونه او د تدوین شواهد)».
د «کلیاتو» په برخه کې د تأسیس د مخینې، زده کړه ییزو او څیړنیزو خدماتو، ساختار او تشکیلاتو، تجهیزاتو او امکاناتو، بشري سرچینو او د پوهنتون د لاسته راوړنو له اړخه د پوهنتون پر پیژندنې سربیره د ستراتیژیک پلان پر اړتیا او د تدوین پر میتود بحث شوی، کوم چې پوهنتون د وړ استادانو او نظر خاوندانو په واسطه د بیاکتنې، زیان پیژندنې او اوسنۍ موقعیت یابي پر بنسټ حوړ شوی دی.

د پوهنتون پیژندنه

خاتم النبیین^(ص) پوهنتون د افغانستان د خصوصي پوهنتونونو په لړ کې یو باوري پوهنتون دی، چې په ۱۳۸۶لیږدیز لمریز کال کې د هیواد د نامتو عالم مرحوم حضرت آیت‌الله‌العظمی محمدآصف محسنی^(ره) او یو شمیر د پوهې مینوالو په هڅو د لوړو زده کړو وزارت څخه د رسمي جواز په ترلاسه کولو سره رامنځته شو او د ۱۳۸۷ کال په پسرلي کې يې د فقه او حقوقو پوهنځي لومړۍ دورې محصلینو په جذب سره خپل علمي او اکاډمیک فعالیت پیل کړ.خاتم النبیین^(ص) پوهنتون په خپل څوارلس کلن علمي مزل کې وکولی شول چې په یوه معیاري علمي او ټولنیز اعتبار لرونکي مرکز بدل شي.

خاتم النبیین^(ص) پوهنتون په دریو بیلابیلو څانګو ټولنیزو، فني او طبي علومو کې د متخصص او ژمن ځواک په روزنه کې خپل رول ادا کړی دی. له دې پوهنتون څخه له جوړیدو نه تراوسه پورې د4056 په شمیر محصلان د لیسانس او د 993 په شمیر محصلان د ماسټري په کچه فارغ شوي دي.اوس مهال د لیسانس او ماسټري په کچه تر دریو زرو محصلین د فقه او حقوقو، سیاسي علوم، قرآني علومو، سوداګریز اقتصاد، سوداګریز مدیریت، سیول انجنیري، برق انجنیري، سافټویر انجنیري، معلوماتي ټکنالوژي، معالجوي طب، غاښونو طب، طبي ټکنالوژي او قابلګي په څانګو کې په زده کړو بوخت دي.

خاتم النبیین (ص) پوهنتون د مناسب علمي او څیړنیز چاپیریال، امکاناتو او نویو تجهیزاتو په چمتو کولو سره د ترټولو ارزښتمنو غیردولتي مرکزونو څخه دی، چې د استادانو او وړ کسانو د همکارۍ، تدریس او څیړنې زمینه یې برابره کړې ده،اوس مهال په دې پوهنتون کې له ۶۰ څخه زیات استادان د دایمي علمي هیأت او ۱۵۰ تنه قراردادي استادان د تخصصي دکتورا او ماسټري زده کړو په لرلو سره په تدریس او څیړنه او له سلو زیات کسان په مختلفو اداري، خدماتي او محافظتي برخو کې په کار بوخت دي. ددې ترڅنګ پیاوړی بشري ځواک، اداري وړتیا، ډیجیټالي سیستم، معیاري زیربنا او مجهز لابراتوارونه ددې پوهنتون نور ظرفیتونه دي.

له علمي بنسټونو سره اړیکې

خاتم النببین^(ص) پوهنتون د علمي تجربو د تبادلې، مطالعاتي فرصتونو د رامنځته کولو او زده کړه ییزو او څیړنیزو همکاریو د لا پراختیا په پار په هیواد کې د ننه او له هیواده بهر د لوړو زده کړو له نورو بنسټونو سره د اړیکو د ودې لپاره اقدام کړی، پدې موخه خاتم النبیین^(ص) پوهنتون وکولی شول په هیواد کې د ننه او له هیواده بهر د اندونیزیا، چین، هند او ایران هیوادونو په ګډون له ۶۰ زیات هوکړه لیکونه لاسلیک کړي او په ملي او نړیواله کچه یې د علمي همکاریو زمینه برابره کړې ده، د پوهنتون د ستراتیژیکو موخو د ترلاسه کولو لپاره د ګډو علمي سمینارونو پر لاره اچول او زده کړه ییزې او څیړنیزې همکارۍ ددې هوکړه لیکونو له لاسته راوړنو څخه دي.

د وزارت په ارزونو کې بریا

خاتم النبیین^(ص) پوهنتون په بیلابیلو څانګو کې د زده کړیالانو د دری دورو له بریمن فراغت وروسته د ۱۳۹۱ کال په ژمي کې د لوړو زده کړو وزارت له لوري له « لوړو زده کړو مؤسسې» څخه «پوهنتون» ته ارتقا وکړه او هم مهاله د ماسټري د دریو څانګو(د جزا اوجرم پیژندنې حقوقو، نړیوالو حقوقو اونړیوالو اړبکو) په رامنځته کولو بریالی شو. او همدا شان په غرني ولایت کې یې د څانګې مجوز ترلاسه کړ. دا ټول موارد د یاد ولایت د مورد نظر علمي او اداري معیارونو او شرایطو او د لوړو زده کړو وزارت له علمي ارزونې وروسته ترسره شول.

دې پوهنتون په ۱۳۸۶ کې له هماغه پیله د ژمنتیا او تخصص په شعار سره د خپلو اکاډمیکو فعالیتونو په برخه کې د ژمن او متخصص ځواک د روزنې لپاره زیاتې هڅې کړې دي. خاتم النبیین^(ص) پوهنتون په ۱۳۹۱ هـ.ش. کال کې د لوړو زده کړو وزارت د تضمین کیفیت پروسې لپاره نوماند شو او د معیاري زده کړه ییزو او څیړنیزو چوپړونو د وړاندې کولو لپاره یې مسؤلانه اوجدي ګام واخیست. دې علمي مرکز وکولی شول په ۱۳۹۵هـش. کال کې د ارزونې په دوهم پړاو کې د زیاتو پوهنتونونو په ډله کې له لوړو زده کړو وزارت څخه د هیواد په کچه دوهم مقام ترلاسه کړي او د تضمین کیفیت د بریالیو شکلي اومحتوایي شرایطو په پوره کولو سره یې په ۱۳۹۹ کې د علمي ارزونې دریم پړاو په بریا سره ترسره او له لوړو زده کړو وزارت څخه یې علمي اعتبار ترلاسه کړ.

زده کړه ییز-څیړنیز او اداري امکانات

خاتم النبیین^(ص) پوهنتون سره له دې چې با کیفیته او معیاري زده کړې وړاندې کوي د ټولنې په پرمختګ کې ونډه خپل رسالت او دنده بولي او د علمي څیړنو په برخه کې خپلو علمي او خدماتي فعالیتونو، صحي خدماتو او د ټولنې د علمي اړتیاوو لرې کولو ته له ملي پراختیا سره د مرستې په موخه پاملرنه کوي. د علمي څیړنیزو مقالو او درسي کتابونو چاپ او خپرول، د علمي کنفرانسونو او کنګرو پر لاره اچول د خاتم النبیین^(ص) پوهنتون څیړنیز فعالیتونه دي.

مناسبه او معیاري زده کړه ییره فضا، معیاري او په زده کړه ییزو تجهیزاتو مجهز درسي ټولګي، منظم اداري دفترونه، معیاري صالون لرونکې او ډیجیټلي کتابتونونه، څیړنیز لابراتوارونه او د کنفرانسونو او غونډو صالون ددې علمي مرکز زده کړه ییز او څیړنیز امکانات دي. دغه ښونیزه، اداري او څیړنیزه فضا په ټوله کې څلور پوړیزه تدریسي ودانۍ د ۴۹ ټولګیو په لرلو سره او د ۳۰ دفترونو لرونکې جدا اداري ودانۍ لري. د فزیکي کتابونو مخزن، د ډیجیټلي کتابتون څانګړی بخش، د مطالعې صالون او د خپرونو، فصلنامو او ورځپاڼو ځانګړی میز ددې پوهنتون د کتابتون برخې دي چې ۲۵۰ متره مربع مساحت لري. یونیم جریب اختصاصي پارکینګ ددې علمي مرکز نور امکانات دي.

خاتم النبیین^(ص) پوهنتون د عملي څیړنیزو او زده کړه ییزو فعالیتونو بنسټیز اهمیت ته په کتو، استادانو او زده کړیالانو ته د اړتیا وړ لابراتوارونه په پام کې نیولي دي او پدې موخه یې د طبي او فني علومو د ضرورت وړ لابراتوارونو یوه ټولګه یې په لاندې ډول چمتو او تجهیز کړې ده:

الف) طبي علوم په بیلابیلو طبي برخو کې ۱۴ بیلابیل لابراتوارونه لري چې پدې ډول دي: د الکتروفیزیولوژي لابراتوار، مالیکولی لابراتوار، د بیوشیمي لابراتوار، د رفتاري مطالعاتو لابراتوار او حیواني لابراتوار.

ب) د فني علومو برخه د سیسکو، سافټویر انجنیري، خاورې میخانیک او کانکریت، برق او فزیک لابراتوارونه لري چې د سیول انجینري، برق انجینري او د کمپيوټر ساینس زده کړیالان ترې ګټه اخلي.

ج) د خاتم النبیین(ص) تدریسي روغتون د عصري تجهیزاتو په لرلو سره د طبي علومو زده کړیالانو د علمي ستاژ ترسره کولو په موخه په ۱۳۹۲ کال کې جوړ شو. د خاتم النبیین(ص) تدریسي روغتون د خصوصي پوهنتونونو په برخه کې لومړی کادري روغتون دی چې د طبي علومو د زده کړیالانو د زده کړې ترڅنګ د ماشومانو داخله او جراحي برخه کې د ټولنې وګړو ته معالجوي خدمات وړاندې کوي. د لومړي ځل لپاره یاد روغتون د ګردې پیوند برخه رامنځته کړه او تر اوسه پکې د ګردې پیوند لسګونه بریالي عملیات ترسره شوي دي.