دغه سیمینار د ۱۴۰۵ کال د ثور په ۳۰مه نېټه د خاتمالنبیین(ص) پوهنتون په لکچر هال کې د کاري موندنې مرکز له لوري او د بشري سرچینو د مدیریت په همکارۍ ترسره شو. دا پروګرام د پوهنتون د ریاست دفتر د رئیس، ډاکټر محمدرضا سیرت، له خوا وړاندې شو او موخه یې د اداري مهارتونو لوړول، د اداري مدیریت له اصولو سره بلدتیا، او د رسمي مکتوبونو د تنظیم له طریقو سره آشنایي وه.
په دې سیمینار کې ټولو هغو محصلانو او فارغالتحصیلانو ګډون کړی و چې په ۱۴۰۴ کال کې د کاري موندنې مرکز له لوري د کورنیو او بهرنیو بنسټونو لپاره د کارآموزانو په توګه ورپېژندل شوي وو. ګډونوالو له وړاندې شویو مطالبو او روزنیزو موضوعاتو څخه ګټه پورته کړه.
د پروګرام په پیل کې، د خاتمالنبیین(ص) پوهنتون د کاري موندنې مرکز مدیر ډاکټر محمدعالم احمدزاده د ګډونوالو هرکلی وکړ، د بشري سرچینو د مدیریت له همکارۍ څخه یې مننه وکړه، او د سمینار د وړاندې کوونکي ډاکټر محمدرضا سیرت څخه یې ځانګړې قدرداني څرګنده کړه.
په دوام کې، ډاکټر محمدرضا سیرت د اداري مدیریت او رسمي مکتوبونو د اساسي مفاهیمو، د پلان جوړونې، سازماندهۍ، رهبرۍ، کنټرول او په ادارو کې د اغېزمنو اړیکو د اهمیت په اړه هر اړخیزې څرګندونې وکړې. نوموړي ټینګار وکړ چې اداري مدیریت د سازمان د فعالیتونو په ښه کولو او د اداري موخو په تحقق کې بنسټیز رول لري.
همدارنګه، د رسمي مکتوبونو په برخه کې د لیکلو د وضاحت او دقت، د رسمي ژبې د کارولو، لنډیز، د مکتوبونو د معیاري جوړښت مراعت، مخاطب ته د درناوي، او د متن له لېږلو وړاندې د هغه د بیاکتنې او سمون په اصولو ټینګار وشو.
په بلې برخه کې د سیمینار په جریان کې د رسمي مکتوبونو بېلابېل ډولونه، د استعلام، وړاندیز او اداري مکاتباتو د تنظیم طریقې، او همدارنګه د واردې-صادرې دفتر او د رسیداتو دفتر له لارې د رسمي مکاتباتو د ثبت او مستندسازۍ بهیر تشریح شو. ګډونوال د اداري مکتوبونو د ثبت، تعقیب او آرشیف له اصولو سره بلدتیا ترلاسه کړه.
د پروګرام په پای کې، د محصلانو چارو معاونیت له لوري هغو کارآموزانو ته چې د کاري موندنې مرکز له لارې ورپېژندل شوي وو، تصدیقپاڼې ووېشل شوې.
دغه سیمینار د ګډونوالو له ښه هرکلي سره مخ شو او د محصلانو او فارغالتحصیلانو د اداري او مسلکي مهارتونو د لوړولو او د هغوی د پوهاوي په زیاتولو کې یې مهم رول ادا کړ.
