د لوړو زده کړو محترم وزارت لخوا د اعتبار ورکولو پروسې د داخلي پوهنتونو د علمي کیفیت لوړونې لپاره زمینه برابره کړه.دغې پروسې په تحصیلي بنسټونو کې د کیفیت لوړولو لپاره مشخص معیارونه او شاخصونه معرفي کړي دي او دې اهمیت ته په کتو یې داخلي پوهنتونونه د علمي اعتبار ترلاسه کولو لپاره ددې معیارونو په رعایت مکلف کړیدي.خاتم النبیین (ص) پوهنتون هم د ژمنتیا اصل ته په کتو چې د هیواد د علمي او اکاډمیکې ټولنې د غوړیدا لپاره یې لري، د لوړو زده کړو محترم وزارت له لوري ټاکل شویو موخو ته د رسیدو لپاره منظم ساختار جوړ کړ، د کیفیت لوړونې، پلان او پالیسي ریاست د علمي کیفیت لوړونې او داخلي او بهرني علمي اعتبار اخیستنې لپاره د یوې کلیدي ادارې په توګه د خاتم النبیین(ص) پوهنتون په تشکیلاتو کې رامنځته شو، دغه ریاست اوس مهال د دوه آمریتونو او دوه اداري همکارانو سره د پوهنتون د علمي کیفیت لوړولو په برخه کې د فعالیت په حال کې دی.

د کیفیت لوړونې او پلان ریاست د کیفیت لوړونې پروسې د کیفیت د بنسټیزه کولو لپاره په لاندې محورونو کار کوي:

د کیفیت لوړول او علمي اعتبار

کیفیت پالنه او لوړتیا غوښتنه د خاتم النبیین^(ص) پوهنتون د کړنو محور دی. د همدې مبارک سفر په لړ کې په ۱۳۹۱ کال کې د خاتم النبیین ^(ص) پوهنتون د ملي اکاډمیک اعتبار اخیستلو په بهیر کې شامل شو، د ټولیز مشارکت له لارې د زده کړه ییزو، څیړنیزو او خدماتي کیفیت د دوامداره ښه کولو اصل په بنسټ او د دې پروسې د ښه مدیریت لپاره، پوهنتون یو منظم اداري او د تصمیم نیونې جوړښت رامنځته کړی دی، دې اهمیت ته په کتو او د پوهنتون رهبري د هراړخیز ملاتړ له برکته د کیفیت لوړونې آمریت د «کیفیت لوړونې » او «پلان او پالیسي» دوه آمریتونو سره د پوهنتون په کچه د کیفیت لوړونې او پلان ریاست ته ارتقا وکړه، چې د پوهنځیو په کچه فرعي کمیټې یې د کاري ساحې، د دندو شرحې او د پورته سطحو عملیاتي پلانونو سره فعالیت کوي.د پوهنتون په کچه د تضمین کیفیت کمېټې غړي د پوهنتون د کیفیت لوړونې او پلان رئیس، د کیفیت لوړونې آمر، د پوهنتون معاونیتونه او د پوهنځیو رئیسان دي، چې دپوهنتون د ریاست لخوا رهبري کیږي.همداشان د پوهنتون په کچه د پلان او پالیسۍ کميټه د کیفیت لوړونې او پلان له رئيس، د پلان او پالیسي آمر، د پوهنتون معاونینو او د پوهنځیو د پلان او پالیسي فرعي کميټو له مسؤلینو جوړه ده او د پوهنتون د رئیس تر ریاست لاندې کار کوي.د کیفیت لوړونې کمېټې مهمې دندې د پلان جوړونه، مشورې ورکول او د پوهنتون په بیلابیلو کچو د برنامو له پلي کولو څخه د څارنې او ارزونې چارې ترسره کول دي، څرنګه چې همغږي، پلان جوړونه او د علمي برنامو له تطبیق څخه څارنه او ارزونه دپوهنځي په کچه د کیفیت لوړونې د کمېټې مسؤلیت دی،په داسې حال کې چې د پلان او پالیسۍ کمېټې مهمې دندې د پوهنتون د لویو سیاستونو ټأکل، د پوهنتون د ستراتیژیک پلان تدوین، اکاډمیکه پلان جوړونه، د عملیاتي پلانونو له پلي کولو څخه څارنه او د پوهنتون په بیلابیلو کچو د عملیاتي او پراختیایي پلانونو ارزیابي دی.

خاتم النبیین^(ص) پوهنتون د هراړخیزو هڅو وروسته د اعتبار ورکونې دریم پړاو ترسره او په بریا سره یې د لوړو زده کړو وزارت له لوري علمي اعتبار ترلاسه کړی دی او د معیاري ښوونیزو خدمتونو د وړاندې کولو په بهیر کې یې یو زرین باب پرانیست.

خاتم النبیین^(ص) پوهنتون د اعتبار ورکولو له دریم پړاو تیرولو او اعتبار ترلاسه کولو وروسته د لوړو زده کړو وزارت له لوري د خپل اعتبار ساتلو ترڅنګ هڅه کوي ترڅو خپل اکاډمیک اعتبار د سیمې او نړۍ له معتبرو بنسټونو هم ترلاسه کړي او دا پوهنتون ژمن دی چې د QS او THEمعیارونو پراساس د پوهنتونونو په رتبه بندي کې هم شامل شي.

سنجونه

د برنامو او کړنو اړوند د تصمیم نیونې د اړتیا وړ معلوماتو د راټولولو پروسه ده، دغه شاخص د پریکړو او کړنو لپاره د اصلي معیار په توګه د پوهنتون په کچه له دوه لارو صورت نیسي،چې هغه څارنه او ارزونه ده.

څارنه

د برنامو او کړنو د سم پلي کولو دوامداره مراقبت او کتنه ده؛ د کار د اجرا پر مهال څارنه د پروسې او چارو له سم تطبیق څخه د ټاکل شویو موخو د ترلاسه کولو لپاره ترسره کیږي. په خاتم النبیین^(ص) پوهنتون کې څارنه ددې اصل په پوره رعایت سره د پوهنتون او پوهنځیو په کچه د ټاکل شویو هیئتونو له لارې صورت نیسي.

ارزونه

دا د کیفیت ښه کولو او لوړولو لپاره د اړینو معلوماتو د راټولولو او داوري کولو پروسه ده. ارزیابي د فعالیتونو د یوې دورې له بشپړولو وروسته وي چې دا اصل په خاتم النبیین^(ص) کې په دری میاشتني/ربعوار شکل صورت نیسي او د باندنیو بنسټونو په ځانګړي ډول د لوړو زده کړو وزارت د ارزونې لپاره هروخت تیاری شتون لري.

د څارنې او ارزونې ساحې

د پوهنتون داخلي څارنه او ارزونه په مختلفو وختونو او مختلفو کچو او ساحو کې صورت نیسي، په لاندې ډول په خاتم النبیین^(ص) پوهنتون کې د څارنې او ارزونې ساحې در پیژنو:

د ټولو علمي برنامو څارنه او ارزونه

د پوهنتون ټولې علمي او اکاډمیکې برنامې په دری میاشتني ډول څارل او ارزول کیږي، پدې برنامو کې ستراتیژیک پلان، د فعالیتونو د ترسره کولو ډول، د پوهنتون د موخو د پلي کولو ډول، د علمي-اداري پړاوونو پلي کول، څیړنې او نورې اداري او اکامیکې چارې شاملې دي.

د استادانو څارنه او ارزونه

د استاد د زده کړه ییزو، څیړنیزو، اداري او خدماتي فعالیتونو څارنه او ارزونه په بیلابیلو ډولونو سره ترسره کیږي لکه:د استادانو ځاني ارزونه، د ډيپارتمنټ، پوهنځي، علمي معاونیت او بهرنیو بنسټونو په واسطه ارزونه.

د محصلانو څارنه او ارزونه

د تدریس له کیفیت څخه د ارزونې د کړنلارې پر بنسټ د یادولو وضعیت، زده کړه ییز فعالیتونه او د محصلینو تحصیلي پرمختګ په بیلابیلو ډولونو ارزول کیږي، په ورځني، اوونیز، د سمستر په منځ او پای کې د صنفي فعالیت مسیر(په بحثونو کې ګډون او د سوالونو مطرح کول او د ورځنیو فعالیتونو ترسره کول)،کورنۍ دنده او د تشخیصي ارزونې په چوکاټ کې د ځواب ورکولو ډول(له ازموینې مخکې)، تکویني(د ازموینې پرمهال) او تراکمي(له ازموینې وروسته).

د معاونیتونو او ټولو څانګو څارنه او ارزونه

د پوهنتون د ټولو اداري څانګو (ریاست، معاونیتونو، پوهنځیو، ډيپارټمنټونو،کميټو او خپلواکو څانګو) علمي او اداري فعالیتونه سره د دې چې په کلني ډول د کړنو د ګزارش له لارې ارزول کیږي، د کال په هرو دریو ماشتو کې د یوه منظم چک لیست په واسطه د کیفیت لوړونې، پلان او پالیسي کميټو له لارې هم څارل او ارزول کیږي. ددې ترڅنګ معاونیتونه د سمستر په اوږدو کې په دوامدار شکل د لاس لاندې برخو د کړنو له څرنګوالي څخه څارنه کوي.

د څارنې او ارزونې الګو

خاتم النبیین^(ص) پوهنتون ارزونه د یوې برنامې د بدلون، بشپړتیا، دوام یا لغوه کولو په اړه د تصمیم نیونې په موخه د اړینو معلوماتو سیستماتیکه راټولونه او تحلیل ګڼي. پدې برخه کې د «کرک پاټریک» له الګو څخه ګټه اخلي. او د شمولیت(جامعیت)،ساده والي(سهولت) او عملي والي(عینیت) الګو څخه ګټه اخیستنه په دریو دلایلو توجیه کیږي. پدې الګو کې د برنامې اغیزمنتوب څلور سطحې لري.

لومړۍ سطحه: د «غبرګون» په معیار سره، د پوهنتون د برنامو او تصمیمونو په اړه د زده کوونکو د علاقې او رضایت په اړه لوری ټاکونکې پوښتنې مطرح کیږي.

دوهمه سطحه:د «یادولو» په معیار سره، پوښتنې د یوې زده کړه ییزې دورې له ترسره کولو وروسته د زده کوونکو د پیژندنې،مهارت،خلاقیت او مسؤلیت په محوریت سره راڅرخي.

دریمه سطحه: د «زده کوونکو رفتار» له معیار نه نیولې تر «کارموندنې» او «د کاري، ټولنیز او اخلاقي رفتار ښه والي» په اړه پوښتنه کیږي،چې د زده کړه ییزې دورې ترسره کول د کار په پيداکولو او په کار او کاري محل کې په رفتار څومره اغیز لرلی دی.

څلورمه سطحه: ددې سطحې معیار« پایلې » دي، محوري پوښتنه داده : زده کوونکي د دورې په ترسره کولو سره د خاتم النبیین(ص) پوهنتون او ټولنې لپاره کومه مادي،معنوي ګټه او ټولنیز باور ل لرلی دی.